Like rundt klokka 14.30 raste det ned ein heil del stein i vegbana på fylkesveg 567 på Osterøy. Ingen personar vart råka av hendinga, men vegen er framleis stengt.

Geolog er på veg til staden for å undersøkja rasområdet, opplyser trafikkoperatør Lise Kristoffersen.

— Det er skilta omkøyring via fylkesveg 368, fortel ho.

I 18-tida vart det klårt at vegen ikkje vil opna før etter påska.

— Me treng å få inn meir ekspertise. For augneblinken er det for risikabelt å rydda vegen. Han vil nok verta stengt til over påske, seier Kristoffersen til NRK.

Kom køyrande

Ifølgje Vegtrafikksentralen gjekk raset ved Geitrheim nord for Lonevågtunnelen.

Ostringen Marianne Eikefet Tepstad kom køyrande like etter at raset hadde gått. Som tredje bil kom ho tett på det som kunne ha vorte ei dramatisk hending.

— Han som kom fyrst i køen hadde sett steinane kome nedover fjellsida, og me hadde nettopp møtt bilen som kom i den andre retninga. Det låg mykje stein i vegen og me kunne sjå at det låg att meir stein som kunne rasa ut, seier ho.

Tepstad fortel at dei er vane med at det går ras på øya.

— Eg kjem sjølv frå Hamre og me hadde eit liknande ras i nærleiken rundt juletider. Og alle kjenner til Bruvikvegen som er særs rasutsett.

Les også:

Stengt på uviss tid

Vegtrafikksentralen veit ikkje når dei kan opna opp att vegen på fylkesveg 567.

— Det er i entreprenøren sine hender, seier trafikkoperatør Kristoffersen.

Ifølgje NRK er det Mesta som skal undersøkja omstenda nærare.