Wenche Puthof kjøpte med seg to ostehorn frå Rimi i Øvre Årdal då ho var på veg til jobb tysdag morgon. Det eine åt ho på jobb, det andre sparte ho til ho kom heim på ettermiddagen.

— Eg sat og braut av små stykkjer frå den eine enden, og hadde berre ein liten bit att då eg sa til mannen at «jøye meg, det er noko hardt inni her», fortel Puthof.

Like etter drog ho ei tann ut av det nesten oppetne ostehornet frå brødgiganten Bakers.

— Det første minuttet sa eg ingenting, både eg og mannen min var heilt i sjokk. Eg ville ikkje tru det eg fann, seier sogningen, som først fortalte historia til Sogn Avis.

Mennesketann med plombering

Ho vurderte om det kunne vere ei dyretann eller noko som hang på eit smykke, men slo det raskt ifrå seg.

— Det var ei mennesketann med både plombering og røter, slår Puthof fast.

— Eg vart skikkeleg uvel. Mannen min råda meg til å ta ein akevitt for å få desinfisert magen, og det gjorde eg faktisk.

Utan matlyst

Halvanna døgn seinare har Wenche Puthof framleis ikkje fått matlysta tilbake.

— Det siste døgnet har eg berre ete salat, men eg sit berre og plukkar på den også. Det byr meg imot.

Ho klarte ikkje eingong å smake på kollegaen sine nybakte bollar. Ostehorn vil ho neppe ete igjen.

— Eg blir berre meir og meir sint. Ein mistar vel ikkje tilfeldigvis ei tann utan å merke det? Eg trur det må vere bevisst sabotasje, eg skjønar ikkje anna.

- Beklager

Ho tykte opplevinga var såpass ubehageleg at ho varsla Sogn Avis. Sidan har ho vore i kontakt med butikksjefen på Rimi, som beklaga episoden.

Bakers AS opplyser at dei vil gå nøye til verks for å finne ut kva som har skjedd.

— Dette er så beklageleg som det kan få blitt, me tykkjer dette er forferdeleg leitt og ser sjølvsagt veldig alvorleg på saka, seier informasjonsdirektør i Bakers AS, Øystein Halvorsen til Sogn Avis .

Hanne Stedje, Sogn Avis