— Eg blei livredd. Ein lama i Lindås er nok det siste ein ventar å sjå, seier Steffensen.

I 13-tida måndag blei politiet i Nordhordland politidistrikt nedringt av sjokkerte bilistar ved Saltneset i Lindås.

55 år gamle Trond Steffensen frå Eidsvåg var ein av dei. Han er i Lindås på påskeferie, og var ute på ein køyretur med hunden sin då det plutseleg kom ein lama springande mot han på hovudvegen.

— Eg køyrde nesten på den. Det var berre flaks at eg hadde så låg fart at eg greidde å svinga unna, seier Steffensen.

Måtte gøyme seg bak bilen

JAGA VEKK: Etter at Steffensen har ropt og dunka i bilen i fleire minuttar for å skremme lamaen, går lamaen den sin veg.
Trond Steffensen

Steffensen stoppa bilen like etterpå for å lufte hunden sin. Då fekk han auge på lamaen på nytt. — Først var den langt unna, men plutseleg kom den springande mot meg. Det såg ut som at den hadde tenkt å angripe meg og hunden min, seier Steffensen.

Han fekk hunden inn i bilen, men rakk ikkje å kome seg inn sjølv før lamaen stod ved bildøra.

— Eg var livredd. Eg ropte og skreik og dundra i bilen for å prøve å skremme den vekk. Til slutt snudde den og gjekk sin veg. Då pusta eg letta ut og varsla eg politiet.

- Sjokkerte bilistar ringjer

Kjell-Idag Vangberg ved Nordhordland lensmannskontor fortel at det er mange som har ringt og varsla om lamaen. Det eksotiske dyret skal ha rømd frå eit gardsbruk i Lindås.

— Dei som ringjer er ganske sjokkerte. Mange forstår rett og slett ikkje kva det er slags dyr dei har sett langs vegen. Ein lama på bilvegen er nok ikkje det mest vanlege å sjå i Noreg. seier Vangberg.

Fare for trafikken

Det er ikkje første gong lamaen har tatt seg ein tur på eigahand.

— Me fekk same meldingar i førre veke. Men det er jo ikkje berre morosamt, den kan jo fort bli ei fare i trafikken, seier Vangberg.

Politiet har sendt ut ei patrulje som leitar etter lamen langs Lindåsvegen, men klokka 14.30 er det framleis ingen teikn til den rømde lamaen.

— Det var ei skremmande oppleving eg ikkje unnar andre. Eg håpar verkeleg dei finn lamaen, seier Steffensen.