Ein kvinneleg asylsøkjar og son hennar fekk livstruande skader i ein brann i Førde mandag. Mor og barn blei etter brannen overførte til brannskadeavdelinga på Haukeland sjukehus. Tilstanden er kritisk for begge.

Mandag kveld kom Rune Lærum og Jarl Løvik køyrande i kvar sin bil mot bygget som ligg like ved fylkesvegen mot Askvoll.

— Vi såg begge at det brann i vindauget, og stoppa. Kona til Rune ringde brannvesenet. Han og eg gjekk inn. Vi såg at det var folk der, og eg kraup under røyken, fekk fat i guten og greidde å dra han ut, fortel Løvik.

Deretter overleverte Løvik det brannskadde barnet til kona si, før dei to på ny gjekk inn i det brennande rommet.

Måtte gje seg

— Kvinna låg i senga. Vi greidde å dra ho ned på golvet før vi måtte gje oss.

I det dei tok seg ut av rommet møtte dei Hogne Grimelid og Bjarne Morken. Dei to var begge på jobb hos Nav hjelpemiddelsentral, nabobygget til Mølletunet.

— Det var ein kollega av oss som oppdaga at det brann. Då vi kom ut kunne vi sjå flammar bak eit vindauge i hovudetasje i bygget, fortel Morken.

Dei to kom til inngangsdøra og møtte mennene som alt hadde vore inn i bygget og berga ut barnet. Også dei hadde ringt brannvesenet, medan dei sprang mot det brennande huset.

Grimelid, som jobbar i brannvesenet, hadde trive med seg eit brannsløkkingsapparat frå arbeidsplassen. Først tømde han halve pulvermengda, så måtte han ut og trekkje frisk luft. Deretter gjekk han inn på ny, og brukte opp resten.

- Tøft å sjå

— Då eg kom inn første gongen brann det på bordet og i senga. Det såg også ut som om det hadde vore eld laus i vindauget, fortel Grimelid.

Etter å ha tømt resten av pulveret i brannsløkkingsapparatet, var det ikkje lenger open eld i rommet. Då Grimelid sprang ut på ny for å trekkje frisk luft, gjekk Morken inn.

— Det var så fullt av røyk at eg såg ikkje golvet. Eg kjende med foten at det låg eit menneske på golvet. Ho låg på ei dyne, og eg drog ho ut på den. Det var tøft å sjå at ho hadde det så vondt, seier han.

Ute la dei kvinna i stabilt sideleie, og passa på at ho pusta til ambulanse kom til staden.

Etter at mor og son var redda ut, kom ein god del folk ned frå tredje etasje i bygget som er ein del av Bergum mottakssenter.

— Det gjekk veldig stille og roleg for seg. Ein røykvarslar stod og peip, men det verka nesten som om dei i tredje høgda ikkje hadde skjønt at det var brann, seier Bjarne Morken.

På autopilot

— Eg handla på autopilot, svarar Grimelid.

Dei to kjenner seg ikkje som heltar.

— Vi vil ikkje at vår rolle skal overdimensjonerast.

Det vil heller ikkje Jarl Løvik som måtte overnatte på Førde sentralsjukehus og få behandling for røykskader.

— Eg hadde fått litt for mykje kolos i meg, så eg måtte ligg med surstoff i natt. Men for meg var dette ganske udramatisk, seier han.

Starta på kvinnas hybel

Brannteknikar gjekk i eittida tysdag inn i det brannskadde huset Førde. Dei fire personane som berga ut mor og barn av det brennande huset, og andre vitne, har i dag blitt avhøyrde.

Truleg starta brannen på rommet der mora og den 20 månader gamle sonen budde. Etter det bt.no kjenner til har vitne forklart til politiet at dette var einaste staden i huset det var open eld.

Lensmann Jan Egil Tvinde har så langt ikkje bedt om assistanse frå Kripos og deira branntekniske ekspertise.

— Vi reknar med at vi har den kompetanse som er nødvendig i eige politidistrikt for å finne brannårsaka, seier lensmannen.

Politiet ville i går ikkje seie noko om brannårsaka, men stadfesta at brannen starta i hovudhøgde der kvinna budde saman med son sin.

BRANN: Nødetatane jobbar på brannstedet mandag kveld.
TERJE ULVEDAL
KRITISK: Mor og son blei mandag flydd til Haukeland Universitetssjukehus med kritiske brannskadar.
ØRJAN DEISZ