Og han slo hardt.

— Lysestaken knakk, fortel Husevåg som har sydd fem stader i hovudet etter det blodige basketaket ved 11-tida i går. Han har dessutan lemlesta fleire ribbein.

I tung narkorus gjekk ein mann inn i eit bustadhus i Florø sentrum. Naboar ana uråd, og ringde Husevåg. Han drog heim frå arbeid, og kom på mannen inne i huset. Der starta basketaket.

Heldt han i sofaen

På veg inn i huset Husevåg tjuven kome ut frå eit soverom med ein bag full av tjuvegods. Husevåg registrerer også skuffer og skap som er opne.

— Han hadde ribba surroundanlegget. I handa heldt han ein høgtalar, og den slo han meg med i hovudet.

Husevåg som har ei fortid som vakt, klarde å få tjuven ned i ein sofa og heldt han der.

— Eg har litt erfaring, og oppfatta at han var påverka. I amfetaminrus får folk uante krefter, og dei merkar ikkje smerte.

Tjuven kom seg på beina att, greip fat i lysestaken og slo hardt fem gonger. Til slutt knakk messinglysestaka.

— Eg følte at han ville kome til å ta livet av meg. Så eg prata til han, og sa at han fekk ta det han ville og gå. Det gjorde han heldigvis.

Blodet rann

Då tjuven gjekk, følgde Husevåg etter med blodet rennande frå dei djupe kutta i hovudet. Han ropte til skremde naboar at dei måtte kontakte politiet. Sjølv prøvde han å halde tjuven tilbake. Han kasta steinar mot beina på han, og trefte slik at han datt av sykkelen. Då tjuven til slutt gjekk, hadde han gitt opp å få med seg tjuvegodset.

Knappe to timar etter at tjuven gjekk inn i bustadhuset, blei han pågripen i ein stolen bil like ved politistasjonen i Florø. Politistasjonssjef Nils Erik Eggen stadfestar at mannen var kraftig rusa.

— Han samarbeidde ikkje akkurat, så vi måtte leggje han i bakken, seier Eggen.

Kom med båten

Den pågripne er ein kjenning av politiet. Mannen er rundt 30 år. Han er ikkje frå Florø, men har opphalde seg i byen dei siste dagane.

— Det kan nok hende vi skal snakke med han om ein del andre forhold enn dette innbrotet, seier Eggen.

— Vil han bli framstilt for varetektsfengsling?

— Det kan hende. Vi har ikkje teke stilling til det enno.

Egil Aardal