— Det gjekk lynkjapt, seier Almås om dramaet om bord i cabincruiseren sin ved Eldøyane på Stord i nitida i dag tidleg.

Den 44-årige bedriftsleiaren berga seg i land ved å leggja på sym før heile båten var overtent.

Rune Almås står søkkvåt på kaien ved sjøsportsanlegget på Eldøyane og forklarer politiet om kva som skjedde då han berre skulle flytta den 25 fot store Saga-båten sin frå kaien ytst på næringsområdet og vel hundre meter inn til båthamna ved Skjersholmane.

- Flammane stod ut

— Då eg sette fart forover, stod flammane brått ut av motoren, seier han.

FULL FYR: - Då eg sette fart forover, stod flammane brått ut, seier Almås.
OVE A. OLDERKJÆR

Brannsløkkingsapparatet var like nær han, men Almås såg ingen sjanse til å få brukt det. Han styrte båten mot moloutstikkaren og heiv seg i sjøen.

Vel i land var Rune Almås snart omringa av eit omfattande hjelpeapparat, kollegaer og nyfikne som strøymde til.

Ambulansepersonellet kunne konstatera at 44-åringen ikkje trong medisinsk hjelp, og brannvesenet kontrollerte at båten brann ut og sokk på 20 meters djup utanfor Eldøyane, like i nærleiken av storverftet Kværner Stord.

Almås opplyser at motoren som tok fyr var ny i fjor.

Båten sank under slep

Politiet vart varsla om ulukka klokka 08.45 fredag morgon.

— Ein mann har hoppa over bord. Han skal ha klart å symja i land, sa Håkon Tornes, operasjonsleiar i Haugaland og Sunnhordland politidistrikt.

Både brannvesenet og hamnevesenet på Stord rykka ut til Eldøyane. Politiet drog også til staden.

Augnevitne fortel at det kom svart røyk frå motorrommet på båten, som låg ei stund på sjøen før den sank.

— Brannen vart sløkt. Båten sank under slep mot land. Det var nesten tom tank og er lite og ingen forureining, seier operasjonsleiar Tornes.

HOPPET: Ein mann hoppa i sjøen fredag morgon då båten hans tok fyr på Stord.
OVE OLDERKJÆR