— Eg er veldig glad. Dette var ei fin oppreisning etter det som skjedde 1. august i fjor, seier Jarle Trå.

I dag slo Pressens faglege utval (PFU) fast at Dagbladet braut god presseskikk i omtalen av Trå sin mislykka ekspedisjon til Mount Everest i fjor. PFU meiner avisa i større grad burde forstått og tatt omsyn til at Trå var i ein vanskeleg situasjon, og at dei difor burde ha venta med publisering slik at han kunne kome til ordet.

Se video av PFU-debatten her.

— Ramma meg hardt og direkte

Jarle Trå låg i sjukesenga på Haukeland då artikkelen i Dagbladet Magasinet kom i butikkhyllene. Ein kamerat kjøpt avisa for han.

— Eg blei sjokkert og forbanna over den feile framstillinga. Etter å ha lest siste punktum blei det umiddelbart klart for meg at «dette slepp ikkje Dagbladet unna med». Det hadde vore skrive mykje i media tidlegare, men dette var hundre gongar verre. Det var direkte ærekrenkjande og injurierande, og ramma meg hardt og direkte som person, seier Trå.

På dette tidspunktet var Trå i ferd med å operere både fingrar og tær.

— Alle kan sette seg inn i kor ille det er, men likevel var denne dagen endå tøffare. Det kom på toppen av alle dei fysiske tinga eg sleit med. Men samtidig som det var tøft, så vekte det for alvor kampånda i meg.

Trå sjekka raskt kor lang tidsfrist han hadde på seg til å formulere ein PFU-klage, og etter to månader gjekk han i gang med arbeidet.

Firmaet ikkje skadelidande

I dag er han nøgd med å ha vunne første siger. Men vurderer likevel sterkt ein runde to.

— Dagbladet har fått seg ein kraftig smekk på fingrane, men eg vurderer veldig seriøst å gå vidare med saka i eit sivilt søksmål. Alle moment i saka talar for, men eg må også vurdere det økonomiske og tidsmessige, seier Trå.

I dag er han i Tromsø for å halde foredrag om turane han arrangerer. I artikkelen som Dagbladet er dømt for, blei Trå blant anna skulda for å ha sett fem liv i fare.

- Kva har dette gjort med omdømmet ditt?

— Med det som skjedde i dag, så vurderer eg at tilliten til firmaet mitt er like stor som før. Eg har hatt ein jamn auke i påmeldingar, og ingen nedgang. Men viss eg ikkje hadde klaga, hadde det garantert fått konsekvensar, seier Trå.

I dag har han fått mange gratulasjonar på e-post, telefon og SMS. No skal han bruke dagane framover til å bestemme seg for om han skal saksøkje Dagbladet for ærekrenking.

Dagbladets sjefredaktør, Lars Helle, trur ikkje Trå vil vinne fram i retten.

— Då er det heilt andre juridiske kriterium. Eg trur Trå skal vere nøgd med dagens kjennelse, seier Helle.