— I helga har det vore relativt store nedbørsmengder. Etter meir enn to døgn med mykje regn er det nesten uråd å finne spor, seier Finn Olav Myhren i Statens naturoppsyn.

Det var i nitida fredag kveld at tre personar i ein bil på veg mot Florø såg ein bjørn stå i vegkanten ved Svarthumlevatnet, vel to mil frå Førde sentrum.

— Eg er heilt sikker, og det er også dei andre to som var i bilen. Vi såg bjørnen veldig godt. Han stod på to bein på oppsida av riksvegen. Den eine labben heldt han opp mot hovudet, det var nesten som han klødde seg, seier Sigrid Irene Kjær Berentsen.

Etter tunnelen

Kjær Berentsen bur i Florø, men hadde vore i Bergen. Ho sat på med dottera til ei venninne og kjærasten hennar frå Bergen til Florø, der dei skulle hente ein hund dei skulle passe. Dei tre køyrde frå Bergen i femtida, og etter ein liten stopp i Førde la dei ut på siste etappe. Ikkje lenge etter at dei hadde køyrt gjennom Naustdalstunnelen stod dyret i vegkanten.

— Det var lyst og fint, så vi såg han tydeleg. Han stod 15 meter frå eit elektrisk gjerde der det gjekk nokre kalvar innanfor. Rett etter staden der bjørnen stod, var det ein sving. Vi hadde kamera i bilen, og skulle sjølvsagt stoppa og køyrt tilbake. Men der og då tenkte vi rett og slett ikkje så langt, det kom først etterpå.

Ein meter høg

Kjær Berentsen har berre sett bjørn på fjernsyn og film før, ho er likevel heilt trygg på at det var det største av dei norske rovdyra som stod i vegkanten i Sunnfjord.

— Han var ganske stor, eg vil tru i alle fall ein meter høg der han stod på to. Han var brei over ryggen, og det såg ut som ein tjukk valk gjekk nedover ryggen til baken. Eg har hytte i dette området, men etter dette trur eg ikkje eg torer meg ut på tur åleine.

Laurdag melde Berentsen frå om observasjonen, og i går føremiddag var Naturoppsynet på staden for å leite etter spor.

— Sjølv om vi ikkje fann noko, ser vi ikkje bort frå at det kan ha vore ein bjørn, seier Myhren.

Det har ikkje kome inn andre observasjonar frå området. For nokre år sidan blei det gjort observasjon av ein bjørn ved Eikefjord endå lenger vest, men heller ikkje den gongen blei det funne sikre prov på at det hadde vore dyr der.

Ung hannbjørn

Dei siste åra er det gjort ei rekkje bjørneobservasjonar i Sogn og Fjordane, og for tre år sidan blei det skote ein ung hannbjørn på Vetlebreen i Fjærland. I vinter låg ein bjørn i hi i Jostedalen i Indre Sogn. Då den gjekk ut av vinterdvalen tok han strake vegen til Austlandet. Ifølgje viltforvaltar Hermund Mjelstad hos Fylkesmannen i Sogn og Fjordane her det sidan ikkje blitt meldt om observasjonar i fylket.

— Men det er kanskje tida no, dersom det er ein bjørn som tenkjer på å finne seg ein hiplass.

Dersom det verkeleg er ein bjørn, tyder alt på at det er ein ung hannbjørn. Slike dyr kan vandre over store avstandar. Ifølgje Mjelstad er det ikkje så usannsynleg at dyret i så fall leitar etter ein høveleg plass å ta vintersøvnen.

Trekkruter

— Dei fleste bjørneobservasjonane stammar frå indre strøk av fylket. Ved eit tilfelle er det påvist bjørn i Gaular. Skulle det vise seg at det no har vore ein bjørn i Flora, vil det vere den vestlegaste observasjonen gjort på mange år, seier Mjelstad.

— Kvifor verkar det som om alle bjørnar som kjem austfrå vandrar inn i Sogn og Fjordane?

— Det har vi også lurt på. Frå Hordaland har vi vel knapt hatt bjørnemeldingar. Vi lurer på om det kan ha noko med trekkrutene deira å gjere.