Vil forske på ME-kurs

Nasjonalt forskingssenter innan komplementær og alternativ medisin (NAFKAM) ved Universitetet i Tromsø samlar på historier frå kronisk sjuke pasientar, som har oppnådd uvanlege resultat etter alternativ behandling.

Ein av desse behandlingsmetodane er lynkurset Lightning process (LP), som BT har omtalt i fleire artiklar denne veka. På få månader har 440 nordmenn, mange av dei ME-sjuke, reist til England for å gå på kurs.

- Slåande resultat
Så langt har NAFKAM samla inn 32 historier frå pasientar med ME/CFS (kronisk utmattingssyndrom). Ni av dei, alle kvinner mellom 18 og 49 år, har prøvd Lightning process. Fellesnemnaren er at dei alle har vore veldig sjuke, men raskt blitt friskare etter kurset.

- Det som er slåande, samanlikna med andre terapiformer, er at behandlingsresultatet er langt betre for dei som har prøvd LP, seier seniorforskar Laila Launsø ved NAFKAM.

No har senteret søkt Norges forskningsråd om midlar til å forske på behandlingsmetoden.

- Vi vil prøve å forstå den prosessen menneske som prøver LP går gjennom, og sjå om behandlingsresultata held på lengre sikt, fortel Launsø.

Sjuk i tjue år
Den eine av pasientane i registeret fortel at ho var sjuk i tjue år og til dels sengeliggjande, før ho tok lynkurset.

- Kvinna rapporterer til oss at ho er på beina igjen. Ho er ikkje symptomfri, men kan stå opp om morgonen og gå lange turar. Kvinna skriv at ho kan leve igjen, og at ho har fått ei framtid.

Felles for ME/CFS-pasientane i registeret sin måte å forstå eigen tilstand på, er at sjukdommen har utvikla seg etter voldsomme stressperiodar eller livskriser, i kombinasjon med kyssesjuke.

Typiske symptom er utmatting, trøttheit og lite energi. Kvinnene rapporterer mellom anna om kvalme, oversensibilitet for sanseinntrykk, hjartebank og dårleg hukommelse. Eit anna fellestrekk er at tilstanden forverrar seg. Mange blir sengeliggjande.

Frå lege til lege
Symptoma er oftast blitt anten avfeide av legane, eller oppfatta som psykiske problem. Pasientane fortel at dei er blitt sende frå lege til lege, og seinare, når dei vert tekne på alvor, utsette for testar som ikkje førte nokon veg.

- Få innan skulemedisinen har vore interesserte i å lytte til pasientane sine erfaringane med alternativ behandling og eigeninnsats, seier Launsø.

- Nettopp dette ser ut til å vere veldig vesentleg, når det gjeld LP.


Har du erfaringer med ME? Legg inn dine kommentarer under!