I tillegg til fiskeri— og kystminister Lisbeth Berg-Hansen (Ap) stiller Hordalands fylkesordførar Tom-Christer Nilsen (H) og ordførarar i seks sunnhordlandkommunar som heiagjeng for Ørjan Johannessen (27) under kokke-VM i Paul Bocuse (86) sin heimby Lyon neste veke.

Dei supplerer ei gruppe på over hundre supporterar frå Austevoll og gastronomisfæren som dreg til Frankrike for å sjå om Bekkjarvik-kokken kan gå til topps i den uoffisielle, men prestisjetunge kåringa der fire nordmenn har vunne før. Som kjent tok Johannessen gull i den europeiske Bocuse d'Or-meisterskapen i fjor.

Austevoll-kveld

— I Lyon skal vi invitera til ein norsk frukost der representantar for næringsliv, politikk og ikkje minst reiseliv og gastronomi vil vera til stades. Vi skal óg ha ein Austevoll-kveld der vi har spesiell merksemd retta mot Ørjan sin heimstad, seier Gro Jensen Gjerde, leiar for Samarbeidsrådet for Sunnhordland.

Under dei to VM-dagane i Lyon tysdag 29. og onsdag 30.januar vil sjølvsagt Austevoll-ordførar og snart påtroppande stortingsrepresentant Helge André Njåstad (Frp) stå ringside og sjå Ørjan Johannessen i aksjon. I Sunnhordland-delegasjonen har han følgje av ordførarkollegane Ruth Ø. Eriksen (H) i Sveio, Odd Harald Hovland (Ap) i Bømlo, Wenche Tislevoll (H) i Fitjar, Liv Kari Eskeland (H) i Stord og Kjetil Hestad (Ap) i Tysnes. Kvinnherad sender rådmann Trond Sætereng.

Tusen nordmenn

Sunnhordland-regionen og produsenten av Salma-laksen skal ha ein eigen stand under Bocuse d'Or og Sirha-messa som blir arrangert i samband med meisterskapen. Matmessa har 2200 utstillarar og ventar 16.000 gjester. Kokketevlinga og messa vil bli gjesta av over tusen nordmenn.

— Sunnhordland er oppdrettslaksen si vogge i Noreg. Vi har både gode smakar, eit leiande teknologimiljø og fantastiske opplevingar, seier Gro Jensen Gjerde.

Det er fire år sidan regionen sist fekk sin kokkeverdsmeister – Geir Skeie frå Fitjar. Dei tre andre norske VM-vinnarane er Charles Tjessem, Bent Stiansen og Terje Ness.

Stolt minister

— Eg er utruleg stolt av norske kokkar. Gong på gong hevdar dei seg i verdstoppen og set Noreg på det kulinariske kartet. Ein av løyndommane er nok at dei har så god kunnskap om råvarer, dei greier å få fram den ekte og reine smaken. Dette gjer norske kokkar til nokre av våre aller beste ambassadørar – for Noreg, kokkekunsten, norske råvarer og ikkje minst for all den fantastiske sjømaten vi har å by på, sa fiskeri- og kystminister Lisbeth Berg-Hansen då hun ønskte Team Ørjan lukke til under avsparket før VM i Mathallen i Oslo sist veke.

Eit vogntog med råvarer og kokkeleringsutstyr blir fredag pakka ferdig før avreise til Frankrike. Assistert av coach-kokk Odd Ivar Solvold i Sandefjord og hjelpar ( commis ) Julie Ekse Jensen har Ørjan Johannessen over 20 gonger øvd seg gjennom matrettane – ein med fisk og ein med kjøt – som han skal laga i Lyon, ifølgje Austevoll-avisa Marsteinen. 27-åringen held konkurrentane frå Frankrike og Sverige som dei sterkaste utfordrarane i VM.

Hemmeleg

— Eg vil sjølvsagt vinna, men det er meir krevjande enn dei fleste kanskje trur, seier Johannessen til Marsteinen.

Korleis Bekkjarvik-kokken skal presentera rettane sine i Lyon er hemmeleg, men råmaterialet til hovudrettane er piggvar og oksekjøt. Ifølgje Johannessen er det på fiskeretten han har best sjanse til å skåra ekstrapoeng i høve til konkurrentane.

— Djevelen ligg i detaljane, seier Ørjan Johannessen, som skal nytta nokre dagar i Lyon til mindre justeringar av tilberedinga og presentasjonen av rettane før meisterskapen er i gong.