På veg til partileiardebatten like over midnatt gjekk Venstre-leiar Lars Sponheim og funderte: Skal eg avlive sentrumsregjeringa i debatten?

Førsetnaden for å avlive sentrumsalternativet var at Venstre ikkje nådde over sperregrensa på fire prosent.

Til Bergens Tidende sa Sponheim:

— Dersom vi ikkje kjem over sperregrensa, men eventuelt får to distriktsmandat - Hordaland og Oslo - blir det for smal basis til å delta i ei sentrumsregjering. Det innser eg. Det blir også uråd å delta i eit regjeringssamarbeid for Venstre.

"H-veljarar kan angre"

På veg ut frå TV 2-studio, møtte Sponheim Kjell Magne Bondevik som var på veg inn.

Bondevik meinte då at Venstre burde satse på vidare regjeringssamarbeid sjølv med berre to representanter på Stortinget.

Før han kom til Stortinget, hadde Sponheim blitt fortalt av "tallknusarane" i TV 2 at heile valresultatet for Venstre sin del kunne bli avgjort av 1000-2000 røyster på landsbasis.

— Det skal vere ein del Høgre-veljarar som skal angre seg for at dei ikkje røysta Venstre om vi ikkje kjem over fire prosent, for det kan også hindre at Høgre kjem i regjeringsposisjon, sa Sponheim.

Venstre kraup stadig oppover mot fire prosent, men gjekk det fort nok?

23.50 kunngjorde Sponheim:

— Vi kan godt klare fire-prosenten. 23.55 sa han:

— Dette er ulideleg spennande.

Klokka 01.45 måtte ein resignert Venstre-leiar likevel konstatere at det ikkje blir noko av ei sentrumsregjering. Venstre hadde enda på 3,9 prosent, berre eit fattig tidel frå den magiske sperregrensa.

— Det ser ikkje ut til at marginane er på vår side. Sperregrensa var målet, og den ser det ikkje ut til at vi når, sa Sponheim til NTB.

- Sentrumsalternativet er daudt

Også KrFs Kjell Magne Bondevik måtte til slutt kaste inn sentrumshandkledet.

­- Sentrumsalternativet er daudt når Venstre ikkje klarte å kome over sperregrensa. To Venstre-mandat er for lite til å kunne stable ei styredyktig regjering på beina, sa Bondevik til NTB då han kom heim til Kolbotn i natt.

— Eg hadde von om at Venstre skulle få inn fleire mandat enn dei fekk, og at sentrum til saman skulle bli større enn Høgre. Det blei vi ikkje, la han til.

Statsministerkandidaten går ikkje med på at plan b - eit samarbeid med Høgre - utan vidare er neste steg.

— Vi har heile tida satsa på ei sentrumsregjering, og vi har ikkje hatt noko plan b. Det har vi heller ikkje no, hevda han.

Før han ynskte journalistane god natt.

INNE I VARMEN: Både Lars Sponheim og Odd Einar Dørum var ved midnatt sikra ein plass på Tinget. Men dei var enno usikre på om Venstre klarte sperregrensa.
FOTO: SCANPIX