På dagen tre månader etter at fire polske unge menn miste livet medan dei var på jobbjakt i Noreg, deltok deira pårørande i ei kjenslesterk minnestund i Etne. Først i Gjerde kyrkje, deretter på ulukkespunktet ved Bjørgjo i Etnefjorden.

— Vi har framleis ingen grav å gå til. Men dette arrangementet gjer det enklare å bearbeida sorga, seier Jodwiga Skorupa (60), mor til ein av dei tre polakkane som enno ikkje er funne trass omfattande søk i Etnefjorden.

Tre framleis sakna

Fire unge menn i alderen 23 til 28 år omkom då den opne båten gjekk rundt, sannsynlegvis natt til 22. juni i år. Berre Pawel Jan Mszanowski (28) er funnen. Damian Golawski (25), Lukasz Jaskulski (26) og Slawomir Skorupa (23) er framleis sakna.

Denne helga har Etne kommune spandert reise og opphald på ni familiemedlemmer av dei omkomne. Laurdagen starta med orientering frå lensmann Ingvar Gjærde og Etne Røde Kors om ulukkesstaden, leiteaksjonane og obduksjonsrapport for den eine sakna som blei funnen natta etter ulukka.

- Ufatteleg farleg

Laurdag ettermiddag var det minnegudsteneste i Gjerde kyrkje i Etne sentrum før dei pårørande saman med det kommunale vertskapet, prestar og hjelpemannskap drog ut i båt til den sannsynlege ulukkesstaden ved Bjørgjo. Der kasta dei pårørande blomar på sjøen, medan Etne-ordførar Sigve Sørheim og den polske konsulen Marcin Spyrka sleppte kvar sin krans på den nesten svartstille fjorden.

TAKKAR: - Det er flott av folket i Etne å ta imot oss på denne måten, seier Beata Roch (29), søster til omkomne Pawel Jan Mszanowski.
BJØRN ERIK LARSEN

— Havet kan vera ufatteleg gavmildt og rikt, men også ufatteleg farleg. Den vakre Etnefjorden skulle vera ei god sommaroppleving for desse gutane, i staden blei dette ei uforståeleg ulukkeleg siste reise, sa soknepresten i Skånevik, Harald Grønnevik på minnegudstenesta.

— Dette var den siste tingen eg kunne gjera for bror min. Han var ein glad og snill person, og mitt einaste søsken. Det var vondt å sjå at han må ha døydd ganske nær land. Ellers er det er flott av folket i Etne å ta imot oss på denne måten, seier Beata Roch (29), søster til omkomne Pawel Jan Mszanowski. Alle dei pårørande er opptekne av å takka Etne og Noreg for alt som er gjort for å finna alle omkomne, det samme er den polske konsulen i Oslo, Marcin Spyrka.

800 timar søk

Roar Fredriksen, leiar i Etne Røde Kors, seier at dei rundt tolv ulike hjelpekorpsa som var med i søket etter polakkane har loggført rundt 800 timar med søk.

Seinast i slutten av august var Kystvakten i Etnefjorden i eit siste forsøk på å finna dei tre sakna. Rundt 600 mål av fjordbotnen er scanna eller gjennomsøkt av dykkarar, utan funn. Fjorden er 170 meter djup ved Bjørgjo der dei fire mennene sannsynlegvis gjekk rundt med båten dei hadde lånt.

MINNEGUDSTENESTE: Laurdag var det minnegudsteneste i Gjerde kyrkje før dei pårørande saman med det kommunale vertskapet, prestar og hjelpemannskap drog ut i båt til den sannsynlege ulukkesstaden ved Bjørgjo.
BJØRN ERIK LARSEN