Store delar av Sogn og Fjordane og Møre og Romsdal vart utan straum i ettermiddag.

— Det oppstod ein feil litt over klokka 18 i dag i Statnett sitt anlegg på Ørskog på Sunnmøre. Den førte til at området langs kysten frå Florø til Ålesund mista straumen, seier kommunikasjonsrådgjevar Gunnar Romsaas i Statnett.

— Vi er no i ferd med å forsyne området med straum via Tafjord Kraft sitt nett, seier han

Klokka 20.15 har dei fleste fått tilbake straumen.

— Den siste oppdateringa eg fekk viser at dei fleste innbyggjarane har fått tilbake straumen. Det er nokon som er utan straum framleis i Sogn og Fjordane, men det er hovudsakleg industri, seier Romsaas.

I Måløy fortel Wenche Svensen at dei fekk tilbake straumen i 20-tida.

Straumbrotet skapte problemer. Sunnmørsposten melder at folk stod fast i heiser og at kjøpesenteret Moa utanfor Ålesund måtte leggje ned all handel som følgje av straumbrotet.