I dag er det berre obligatorisk med ein time mekling ved samlivsbrot. Det er altfor lite ifølgje psykologiprofessor Odd Arne Tjersland ved Universitetet i Oslo.
- Ordninga fungerer ikkje godt nok. Ein time er altfor lite til å få på plass avtalar som sikrar at det ikkje oppstår konfliktar mellom foreldra og borna, seier Tjersland.
Dersom foreldra ønskjer det, kan dei få sju timar med mekling, men svært få nyttar seg av dette tilbodet, ifølgje Tjersland.
- Ved eit samlivsbrot er det sterke kjensler involvert, og dei fleste vil berre kome seg vidare. Hadde det vore fleire obligatoriske timar med mekling, trur eg det hadde vorte færre konfliktar i etterkant, seier Tjersland.
Professor Frode Thuen ved Høgskulen i Bergen er einig.
- Familievernkontora har fått mindre ressursar dei siste åra, og det er svært uheldig. Får ein ikkje i stand skikkelege avtalar med borna, er risikoen større for at dei får problem seinare i livet. Difor er det så viktig med mekling, seier Thuen.
