Emtunga Offshore AB og Leirvik MT har vore Europas hovudkonkurrentar innan bygging av offshore bustadkvarter. Før jul slo Emtunga seg konkurs fordi hovudkunden MPF Corp – med hovudkontor i Oslo – var blitt insolvent som følgje av den globale finanskrisa.
Leirvik MT – familieselskapet som blei kjøpt av Sørco AS i Sandnes i 2005 – offentleggjorde etableringa av Leirvik Emtunga AB på ein pressekonferanse i Vara kommune nordaust for Göteborg i føremiddag.
Emtunga hadde 65 tilsette før konkursen, og har spesialisert seg på offshore bustadmodular i stål. Det var leveransar til MPF (Multi Purpose Floater) Corp. Ltd. som Emrunga ikkje fekk oppgjer for i tide, og som forårsaka konkursen. Kravet mot MPF var på 100 millionar svenske kroner.
– Vi har kjøpt Emtunga Offshore AB sine immaterielle rettar, arkiv- og databasar frå konkursbuet og grunnlagt Leirvik Emtunga AB. Når vi i tillegg har fått med oss hovudkjernen av tidlegare Emtunga sine svært motiverte medarbeidarar, har vi teke eit viktig steg i vår langsiktige strategi, seier Harald Karlsson, administrerande direktør i Leirvik MT.
Hovudmålet for Leirvik MT er å bli den leiande leverandøren av bustadkvarter, ikkje berre for nordsjømarknaden, men også internasjonal.
SVENSKEKJØP: Leirvik MTs direktør Harald Karlsson til h. og Christofer Edström i Emtunga Offshore på prsessekonferansen i Vara ved Göteborg i dag der Leirvik MTs oppkjøp blei offentleggjort.
