- Akkurat no er det vekst over heile fjøla, seier avdelingsdirektør Tommy Johansen i NAV Hordaland. (NAV er ei samanslåing av Aetat og trygdeetaten).
NAV-tilsette har i dag lite å gjere med ordinære arbeidssøkjarar.
Av dei 6000 helt ledig i Hordaland vil halvparten vere i jobb innan tre månader. Den einaste kontakten mange arbeidslause har med etaten er når dei registrerer seg på Internett.
Også for dei 8500 såkalla yrkesvalhemma i Hordaland er det blitt betre tider, ifølgje Johansen.
- Vi ser at fleire av dei yrkesvalhemma får jobb i dag enn for to-tre år sidan, seier han.
Industrien går så det susar
Konjunkturbarometer for industrien i tredje kvartal, som Statistisk Sentralbyrå (SSB) la fram i går, viser at industrien går så det susar, og at industrileiarane ser lyst på framtida.
Ordrereservane er rekordhøge og prisane stigande. Spesielt i verkstad- og trevareindustrien klagar industrileiarane over mangel på kvalifiserte folk.
Talet på bedrifter som seier at dei manglar folk har stige raskt berre sidan i fjor, frå 6,3 prosent i tredje kvartal 2005 til 14,5 prosent i tredje kvartal 2006.
Denne statistikken viser at arbeidsmarknaden er fullstendig endra på få år. Etter kriseåret 2002, då industrien flagga ut tusenvis av arbeidsplassar, var det så få som 1,6 prosent av bedriftene som melde om at tilgangen på arbeidskraft var eit problem.
Og etterspørselen etter arbeidskraft er rekordhøg. SSB sine tal, som går tilbake til byrjinga av 80-talet kan ikkje vise maken til etterspørsel i nokon av dei tidlegare oppgangstida i økonomien.
Verst i Hardanger
Høgast temperatur i arbeidsmarknaden i Hordaland er det i Bergen og nabokommunane vest for byen (som er rekna som ein del av Midthordland i vår oversikt).
Hardanger har den lågaste tilveksten av nye jobbar i fylket. At arbeidsløysa likevel er låg skuldast delvis utflytting.
- Vi har ein situasjon i Hardanger med relativt låg arbeidsløyse, men samstundes er det netto fråflytting i regionen, seier Johansen.
I Sogn og Fjordane er arbeidsløysa høgst i Vågsøy. Det skuldast nedleggingar i fiskerinæringa og ringverknadene det skaper, i fylgje avdelingsdirektør Frode Henden i NAV Sogn og Fjordane.
- Spesielt Vågsøy har vore og er inne i ein tøff periode, og har betydelege utfordringar når det gjeld å erstatte arbeidsplassar, seier Henden.
Resten av Sogn og Fjordane er prega av oppsvinget, eit oppsving som held fram i år, spesielt i kommunar som Florø der skipsbyggingsindustrien spelar ei stor rolle.
