– Norges Fiskarlag har ført eit massivt korstog mot fisketurismen i 10 år, seier Borch.
Resultatet av presset frå fiskarlaget er eit forbod mot å ta med seg meir enn 15 kilo fisk heim.
15-kilosgrensa trugar den veksande fisketuristnæringa og vedtaket byggjer på manglande kunnskap, meiner Borch.
Ho er seniorforskar ved Norut Samfunnsforsking i Tromsø, der ho mellom anna arbeider med ein doktorgradsavhandling om fisketurisme.
Fiskarane står for sterkt
Borch meiner striden om fisketurismen er eit døme på korleis ei sterk gruppe kan utnytte mangel på kunnskap for å fremje sitt syn.
– Fiskarane oppfører seg som om dei eig fiskeressursane. Reiselivsnæringa har i veldig liten grad blitt høyrd seier Borch til Bergens Tidende.
Vi veit lite både om omfanget og konsekvensane av turistfisket, både økologisk og økonomisk. Debatten rundt turistfiske er bygd på dårleg dokumenterte påstandar, meiner Borch.
Trass i at fisketurismen har vore ei rask veksande næring, som gir inntekter og arbeid i kystdistrikta er omtalen i media dominerte av negative oppslag, i fylgje Borch. Det handlar om smugling av sprit og tobakk, turistar utan sjøvett, turistar som ikkje legg att ei krone og ikkje minst turistar som køyrer heim med bilen fullstappa av fisk.
Sporv med kanonar
Borch har også lite til overs for argumentet om at turistfisket må avgrensast for å verne kysttorsken.
Havforskarane har for fjerde år på rad bede om at det ikkje vert fiska kysttorsk – som er ei rekke eigne stammar langs kysten – inntil kysttorskstammane har teke seg opp igjen.
Er det slik at torskestammane på kysten er meir vare for utlendingar som berre fiskar med pilke og stong, enn for nordmenn som også kan bruke garn og line, spør ho ironisk.
Borch ser for seg fleire tiltak som kan verne kysttorsken:
- Fiskestopp (for alle) i visse fjordar eller område i heile eller delar av året..
- Forbod mot å fiske truga artar. Det betyr at truga artar, som torsk, må settast ut igjen. Vanleg i sportsfiske i utlandet.
- Grense for kor mange fisk kvar turist får ta opp per dag. Prinsippet er brukt både i småviltjakt og laksefisket i elvane.
Slike tiltak er langt meir presise enn ei utførselsgrense på 15 kilo for turistane, og trugar ikkje ein del av turistnæringa som gir vel så gode ringverknadar for samfunnet som tradisjonelt fiskeri, meiner Borch.
