Lagar smilehotell

Gründerhjelparen og bedriftsrådgjevaren frå Stord har saman med slekt og lokale krefter kjøpt Skånevik fjordhotell i Etne for seks millionar kroner. Larsen Nerheim (50) er majoritetseigar i hotellet der ho første gong jobba som 16-åring.

I Skånevik er det no håp om at det blir eit varig eigarskap bak hotellet som har hatt fem ulike eigarar dei siste fem åra. Hotellet har vore stengt sidan før jul. Dei nye eigarane overtek 1. april og opnar dagen etter.

I tråd med Larsen Nerheims spesialkompetanse ønskjer dei nye eigarane å skipa eit senter for etablerarar, leiar- og bedriftsutvikling i Skånevik. Elles skal hotellet vera eit turisthotell om sommaren, avvikla kurs og konferansar, og tilby underhaldning, helseprogram og opplevingar utanom det vanlege.

Dei nye eigarane skal driva hotellet som eit lag, nærmast på dugnad i starten. Inger Karin Larsen Nerheim skal driva si kursverksemd som før, og vil ikkje flytta til Skånevik. Mannen Leif Kåre Kaldestad er også med på eigarsida, saman med Larsen Nerheims bror Lars Inge Larsen, nevøen hans Kjetil Nedreskår og Skånevik-ekteparet Gro Aasheim Bøthun og Øyvind Bøthun.