Terreng: Sti, traktorveg og asfaltveg den avsluttande biten
Tid: Ca. 3 timar.
Vi tilrår å sjekka avgangstidene for Hangursbana på førehand. Parkering i sentrum på Vossevangen, eller ved Hangursbana.
Frå Vangskyrkja i sentrum følgjer vi skilt merka Hangursbana. Gå under jernbanebrua og vidare rett fram., så til høgre ved merka skilt og opp til nedre stasjon for Hangursbana.
Hangursbana løfter oss opp 600 meter på 5-6 min. Ved øvre stasjon er det restaurant/kafe, toaletter etc. Flott utsikt over Vossebygda!
Frå øvre stasjon og Hangursrestauranten (5) er det ulike stiar å følgja ned til sentrum. Eitt alternativ er å gå den bratte stien under Hangursbana via Skitset (4) til Mølstertunet (3) og vidare på asfaltert veg til sentrum. Her er det ein del bratte parti som krev ekstra varsemd.
Ein litt lengre tur i fint fjellterreng startar på oversida av Hangursrestauranten, opp bakken til venstre. Vi kan følgja «T»-merka sti gjennom lett terreng forbi Røde kors hytta og Valberg tjern på høgre sida, fram til Frukosthola (6).
Her i frå ser vi ut over eit område som er eit skieldorado på vinterstid, med Lønahorgi (1412 m.o.h.) i nordaust.
Vi kan ein returnere - ta same stien attende til Hangursbana og ta bana ned att til sentrum - eller ta til venstre vestover mot Kisseldur (7). Kisseldur-stølane høyrar til gardane Dolve på Dyrvedalen og det var stølsdrift her fram til 1960. Følg sti og skilt vidare mot Vossevangen. Lett terreng, skiftande frå tørt til meir myrlendt. Vi vandrar gjennom lett skogsområde og på hausten finn ein skogsbær på rindane.
Ved Heggjavad (8) går vi inn på bilveg og følgjer denne vegen forbi garden Raugstad. Vidare på asfaltveg attende til sentrum.
Hugs: Grunneigarane har opna opp for turvegen, og alle som fylgjer veg og sti må forvalta denne invitasjonen på best mogeleg måte. Hugs og lat att grindar, ver var om dyr i marka, og far fint med naturen. Ver merksam på lokale reglar for bandtvang for hundar. Sjølv om fotturane er lagt godt tilrette og merka, kan det alltid vera noko som endrar seg, eller synest å mangla. Dei som har lagt turane tilrette, tar ikkje ansvar for skader eller anna som måtte skje under turen. Turen blir gjennomført på eige ansvar og risiko.
Fleire turtips frå Voss og omland finn du her
Har du erfaringar frå denne turen? Del dei med andre i kommentarfeltet under:
