Strikk i interiøret er ein av årets trendar og mange ønskjer å strikka seg noko nytt til heimen. Det har dei merka på Husfliden i Bergen.
- Me føl med på kva som er i tida, og såg at det var ein del strikk i interiøret på veg, fortel Irene Tørhaug, dagleg leiar ved Husfliden i Bergen.
- Me strikka ein puff og sette den i utstillingsvindauget og fekk enorm respons frå kundar som ville prøve å laga seg eit slikt lite møbel sjølv. Dei er superenkle å lage, legg ho til.
- Mange av kundane er unge vaksne i etablerarfasen som ikkje nødvendigvis har råd til å kjøpe designmøblar i dyre butikkar. Då kan dette vera eit godt og rimeleg alternativ.
Tova stolpute
Det er berre fantasien som set grenser for kva du kan strikka eller hekla til boligen din.
- Dersom du vil setta eit nytt preg på spisestova, kan du tove dine eigne underlag til stolsetet.
- Strikk ein firkant i det mønsteret og dei fargane du vil ha. Når du er ferdig hiv du den i vaskemaskina med ein kork grønsåpe, og vaskar på 50 grader. No kan du dra og forme den litt slik at den blir slik du vil ha den. Du kan også klippe i underlaget etter at det er tova.
Strikka puter
- Puter er det ein god del som innom og ønskjer å laga. Dei kan ein både strikka og hekla i alle slags fargar og mønster.
Ein kan også strikka ting som dukar, leiker, pledd og bordbrikker.
Lampe
- Det var ei ung jente innom her og sa ho ville laga seg ein lampe. Ho prøvde å forklara korleis den skulle bli, og då forstod eg at ein slik lampe laga eg sjølv då eg var 16 år gammal.
Slik gjorde eg det: Eg kjøpte ein badeball som eg blåste opp. Så surra eg garn rundt heile ballen, men lot det vera ein opning på toppen. eg brukte tapetlim og smurde inn alt garnet med, før eg lot ballen hengje til tørk eit par dagar. Når alt hadde tørka slapp eg lufta ut av badeballen og fekk den ut gjennom opninga på toppen.
Resultatet vart ein kjempefin lampeskjerm. Alt eg trong var ein lampeinnsats som eg festa inni. Lampen vart kjempefin og eg hadde den i mange år, fortel Tørhaug.
Strikker du? Syng ut i kommentarfeltet under!
