- Eg hadde drøymt om ein mobil verkstad, så då eg fekk sjå biletet på eBay, byrja hjartet å dunke. Ho er mi, tenkte eg. Og det var ingen andre som baud på ho, seier Cathrine Bysheim med eit smil.

Det er ein kald vintermorgon, men inne i campingvogna, som inntil vidare står parkert på tunet utanfor foreldra sitt hus på Hosanger på Osterøy, er det varmt og triveleg.

Cathrine serverer kaffi og søte kjeks og fortel ei sann historie som eigentleg høyrest ut som eit eventyr. Om å vakne opp i vogna til ein ny morgon i Australia, med ei kjempelang, kvit sandstrand som nærmaste nabo.

- Ei reise

Omgitt av fargerike papegøyar og nyfikne gekkoar. Ta seg eit bad, lage ein fruktsalat til frukost.

- Denne campingvogna har vore på ei stor reise. Eg køyrde 10 tusen kilometer med ho, før eg rygga ho inn ein container i Brisbane. Etter å ha budd nesten ti år i London og tre år i Australia, er ho det einaste som er mitt eige, sjølv om det ikkje er heilt kvalitet, vedgår Cathrine.

Ho er utdanna gullsmed og arbeider som smykkedesignar. I tillegg har ho utdanning som kinesolog og muskelterapeut, og jobbar også innan dette feltet.

Smykkeverkstaden har Cathrine i campingvogna, som sannsynlegvis er laga ein gong på 1940- eller 1950-talet.

Glittermaling

- Eg har sjølv malt ho lilla og isolert vogna. Innandørs på veggene, har eg brukt glittermaling. Når lyset kjem inn, glitrar det så fint, konstaterer 33-åringen som måtte ut med om lag 6000 kroner for den originale doningen.

- Når eg kjem ut om morgonen og ser campingvogna, blir eg varm rundt hjarterota. Ho er jo berre herleg! Er det små lekkasjar og sånne ting, blir eg bekymra. Eg er jo ops på at ho er så gammal. Planen no er å få eit nytt understell til vogna og få ho omregistrert, slik at eg kan reise rundt med ho. I sommar skal eg på slektsstemne til Senja, kanskje kan det bli ei kunstreise, seier Cathrine Bysheim og smilar ved tanken.