Hard Anger klare til dyst

Den nystarta Hard Anger Open Air Metal Festival går av stabelen i Måbødalen siste helga i august, og har no sloppe det endelege programmet. Det norske metalbandet Susperia, kjend frå Melodi Grand Prix i fjor, toppar plakaten.

På programmet står òg banda Claymords, Fjordfader, Goddamn (alle norske), Endstille og Leviathan (Tyskland), finske Ensiferum, amerikanske Disgorge, svenske Skogen og estiske Tharapitha og Neoandertals.

USA-band eksklusivt

Festivalsjef René Roverts er nederlandsk, og bestemte seg for å starta festivalen då han køyrde forbi landskapet i fjor sommar. No ser han fram til det heile brakar laus, og trekkjer fram amerikanarane i death metal-bandet Disgorge som eitt av høgdepunkta på programmet.

- Dei var oppløyst i nokre år, før dei kom saman att for nokre veker sidan. Dei har lova at festivalen vår er den einaste europeiske dei skal spela på i sommar, seier Roverts.

Hard Anger-festivalen plukkar opp hansken etter at Hole In the Sky-festivalen i Bergen blei arrangert for siste gong i fjor sommar.

Interesse frå Chile

Festivalsjefen meiner banda og omgjevnadene til utandørsfestivalen skal gjera det til ein av dei mest interessante i verda.

- Det er ein utandørsfestival ved foten av Hardangervidda. Noreg er jo òg fødestaden til black metal, så me merkjer mykje utanlandsk interesse for å vitja festivalen. Blant anna har me gjort eit intervju med eit magasin i Chile, seier ein entusiastisk festivalsjef.