Denne garantien kjem frå Jeannette Platou, ny programleiar for Safari på NRK 1. I dag er det klart for nypremiere på samtidskunstmagasinet, og kveldens tema er gatekunst. Eller street art.
- Graffiti, altså?
- Nei. Graffiti er sprayboks rett på vegg. Gatekunst er så mykje meir, seier Platou til BT.
I kveld tar Safari oss med på ei stor, internasjonal utstilling i Newcastle som viser gatekunst på høgt nivå - i spennet mellom gate og galleri, og med referansar til grafisk design, graffiti, skateboard og surfekultur.
Kunst på rasteplassen
Gatekunsten lever i opposisjon til reglar og konvensjonar i kunstlivet. I staden for å stille ut på galleri og museum, reiser kunstnarar frå by til by, bruker gata som visingstid og Internett som salsstad.
Også Norge har fleire gatekunstnarar, og i kveldens Safari møter du Jannik Aabel og Strøk.
- Etter å ha sett programmet lovar eg at du kjem til å sjå på gatene på ein heilt annan måte, anten du er i Oslo, London, Paris eller New York, seier Platou.
Også langs våre heimlege Nasjonale turistvegar kan du møte kunst undervegs - på utkikkspunkt eller rasteplassar. Målet med turistvegprosjektet til Statens vegvesen er å framheve naturopplevingar ved hjelp av arkitektur og kunst.
- Dette er ikkje nasjonalromantikk, men spreke ting, understrekar Platou, som dreg på safari til fleire rasteplassar i Finnmark i kveld.
Nært og internasjonalt
NRK marknadsfører Safari som ei oppdagingsferd i norsk og internasjonal samtidskunst. Dette perspektivet passar den nye Safarisjefen godt.
Platou har jobba både med innan- og utanriksstoff i NRK dei siste åra. Tidlegare arbeidde ho med filmstoff, blant anna i Stockholm, London og Frankrike.
- Eg har sakna å jobbe med kulturstoff igjen, så eg heiv meg på då sjansen kom - og fekk jobben!
- Kva er di største utfordring i Safari?
- Mange av kunstnarane vi møter har store namn, og er vande med å bli intervjua av mange. Min jobb er å få desse personane til å bli ekte og levande.
- Fort gjort å bli fylt av ærefrykt når ein møter store kunstnarar?
- Veldig. Men det handlar om å tore å stille spørsmål, ikkje vere redd for å provosere, få dei til å snakke frå hjarta og gjere dei endå meir tilgjengelege. Slike menneskje er ikkje annleis enn oss, og dei likar ei utfordring.
- Safari går på lufta klokka 22:30. Kvifor blir alle kulturprogram sende så seint på kvelden?
- Det lurar vi på også! Vi skulle ønskje programmet vart sendt tidlegare.
