Poesiskrivinga til Fosse har nok hamna litt i skuggen av dramatikken, trass i at det poetiske grunnleggjande er til stades også der. Fosse har gjeve ut dikt jamt og trutt, ved sida av romanprosa, essaystikk og dramatikk. Samlingane står ikkje fram som bundlar av einskilddikt, men som einskaplege syklusar, noko ein ser godt når ein les dei fem samlingane og dei ti einskilddikta i boka. På tvers av samlingane førekjem eit knippe faste bildekrinsar knytt til hav, bølgjer, stein, båten, fjorden, hund, engel, augo og vatn.
I ein så formmedviten og konsekvent forfattarskap som Fosse sin varierer ikkje skrivemåten radikalt, men endrar seg litt frå samling til samling. Debutdikta i «Engel med vatn i augene» verkar meir ekspresjonistiske enn dei seinare samlingane. Eg-et kan her stå både redd ovanfor verda, og framand ovanfor den forma redsla uttrykkjer seg gjennom, noko som gjer at skrekken så å seie fordoblar seg: «Eg skrik/Eg høyrer det er hòl i skriket/Ein gapande munn ser seg sjølv».
Tilveret blir ikkje nett meir samanhengande og dikta får heller ikkje ei meir avklåra form i dei seinare samlingane. Likevel er det som dei uttrykkjer ein merkeleg tryggleik, trass i at naturen og tinga framleis vender seg tause bort. Skrifta evnar å romme dei menneskelege motseiingane, det prosessuelle, eksistensens gåte, spalting og smerte: «(ho) finn seg/eit gammalt fotografi/der tanken/igjen kan bli bilde/rundt ei sorg ho alltid har vore». I dette diktet forskyv sorga seg mellom, og blir suksessivt inneheldt av, fotografi, tanke og bilde. Til sjuande og sist held diktet dei motstridande elementa samla, i bildet, i språket si ustabile virring.
I poesien til Fosse møter ein konkretiseringar av dei store kategoriane som livet, meininga og skrifta. Som lyrikk skriv Fosse like besettande og rytmisk som i prosaen og dramatikken. Sjølv om drivkrafta i poesien ligg i skrivehandlinga, i den fysiske, musikalske skrifta, og sjølv om forfattaren skriv nedpå og fantastisk «om det vanlege», skapar Fosse samstundes sterke bilete, dei kjennest gyldige.
SINDRE EKRHEIM
Enig med vår anmelder? Si din mening her.
