Div. / Gunvor Rasmussen
««Eventyrboka. Nynorske forteljingar»»
Den tjukke «Eventyrboka» frå Skald forlag er oppfølgjar til «Godnattboka» frå 2007. For to år sidan gav forlaget oss toogtjue godnattforteljingar, denne gongen har nitten kjende og mindre kjende forfattarar fått i oppdrag å skrive eventyr.
«Godnattboka» hadde ei stor svakheit: Alle forteljingane skulle på eit eller anna vis vere knytt til natt eller søvn, og resultatet blei keisamt å lese i samanheng. Denne svakheita blir forsterka i «Eventyrboka». Lesaren går fort lei av tretal, kongelege og seljefløyter. Likskapen mellom forteljingane i den førre samlinga var berre motivisk, medan sjanger, stiltone og tematikk varierte. I «Eventyrboka» liknar dei nitten forteljingane kvarandre også på desse punkta. Nesten utan unntak har forfattarane valt seg under-eventyra som førebilete, og ein må leite lenge etter spenstige vriar på det kjende skjemaet med hindringar og hjelparar.
Dermed blir det Gunvor Rasmussens illustrasjonar som står for både breidda og den raude tråden. Sjølv om streken og teknikken er den same gjennom heile boka, har ho skapt eit eige univers for kvar tekst. Prinsessene og eventyrarane er alt frå robotar og dataspelfigurar til japanarar og vikingar.
Når den tekstlege variasjonen blir liten, er det først og fremst forlaget si skuld. Samstundes har mange av forfattarane valt lettvinte og tradisjonelle løysingar. Eit heiderleg unntak er «Kokken fra Calabria» av Katrine Sele - ei fantastisk forteljing om matglede og livslyst - og bidraga til Ingelin Røssland, Solfrid Sivertsen og Stein Erik Lunde skil seg positivt ut.
Positivt er det også at dei logiske brestane og haltande sluttane som førre boka hadde ein del av, ikkje finst i «Eventyrboka». Kanskje har redaktøren våga å vere ein meir aktiv medspelar denne gongen, og den litterære kvaliteten er dermed heva.
Tanken bak dei to antologiane er god: Slike korte høgtlesingstekstar for småtrinnet er sjeldan vare og møter eit reelt behov. Eg håpar difor at Skald finn eit betre og meir inspirerande utgangspunkt til forfattarane neste gong, slik at tekstutvalet blir artigare og meir variert lesing.
PETRA J. HELGESEN
Enig med vår anmelder? Si din mening her.
