Dansk beatpoesi på vestnorsk musikkfestival

Den danske beatpoeten Claus Høxbroe kjem fredag til Kulleseidkanalen på sunnhordlandsøya for å halda såkalla «poetry slam». Seks poetar les opp sine eigne dikt frå scenen, og publikumsresponsen avgjer kven som går vidare.

Festivalgeneral Geir Ersland var på jakt etter eit innslag utanom det vanlege, og fann Høxbroe då han via nettet leita etter originale poetar.

Kjempar mot lokale heltar
Dansken vil under poesikampen kjempa mot lokale diktarar. Ersland har enno ikkje alle deltakarane klare, men kan nemna at bømlapoet Ole Jakob Totland er blant dei.

- Innslaga vil halda seg på shownivå, med både ferske og meir erfarne diktarar. Det einaste kriteriet er at deltakarane må framføra eige materiale.

Melkevikfestivalen starta for fem år sidan, då som ein fest for vener og kjende av arrangørane. Dei siste tre åra har festivalen auka i omfang, og i fjor løyste 1200 personar billett i løpet av to dagar.

Jazz og improlyrikk
Claus Høxbroe har gitt ut diktsamlinga «Hylet fra Gaden», og vann i 2005 publikumsprisen under den danske diktfestivalen Poesiens Dag.

Laurdag vil han gå saman med musikarar henta frå faglærarutdanninga i jazzmusikk ved Universitetet i Stavanger. Beatpoeten vil på ståande fot framføra dikt med utgangspunkt i stikkord levert frå publikum, medan musikarane vil improvisera tonefølgje til dikta.

Festivalsjef Ersland har sansen for innslag han meiner skil seg ut frå det vanlege på ein musikkfestival.

- Eg trur folk likar å oppleva ting som er litt rare og snodige. Det som blir mest spennande er om folk skjønner kva han seier, spøkjer han.

Elles på programmet til Melkevikfestivalen står blant anna bergenske Kakkmaddafakka og Aftenlandet-vokalist Astrid Kloster Særvolls hyllestkonsert til Kenneth Sivertsen; Spor.