Helga 24.-25. august vert det folksamt på den gamle handelsstaden Glesvær i Sund, når nyskapningen «Periferifestivalen» vert arrangert.
Forutan Nathalie Nordnes og William Hut, som i går var med og skapte blest om festivalen, står ei rekkje vestlandsartistar og band på programmet.
Fredagen kjem herrane Finn Tokvam, Halvor Folgerø og Odd-Erik Lothe i Finn Erix, som har med seg forfattaren Frode Grytten som assosiert medlem.
Same dagen spelar óg HP And His Patient Orchestra (HP Gundersen), Team Blitzkrieg og Frank Hammersland sitt Pogo Pops.
Kakkmaddafakka
Laurdagen kjem Morten Abel med band, Kakkmaddafakka, og det same gjer påtroppande teatersjef på Den Nationale Scene, Bjarte Hjelmeland, som har Terje Vigen på sitt program.
Bjarte Hjelmeland er oppvaksen på Hammersland nær Glesvær, og har tilknyting til området, slik óg mange av dei andre artistane og arrangørane har.
Sondre Lerche kjem med bandet sitt Faces Down, og askøyværingen Magnet (Even Johansen) dukkar opp, og det gjer også Sgt. Petter (Petter Folkedal) med band. Tingingsverket er tildelt elektronikaduoen Kaptein Kaliber.
«Spist og moderne»
«Havsus møter populærmusikk» er undertittelen til festivalen, og det handlar om å vere ein del av den kulturelle utviklinga i regionen, seier festivalsjefen, Ole Øvretveit:
– Vi vil ta vare på den gamle strilekulturen ved å fornye den, ved å lage noko som er spist og moderne.
Ole Øvretveit bur i Bergen, men kjem sjølv frå Glesvær.
– Går det bra i år, så arrangerer vi festival neste år også, lovar han.
Artistane har ikkje vore tunge å be.
– Det var lett å seie ja til å vere med. Dei lova jo fint vær og grilling! ler Nathalie Nordnes.
Også Loddefjord-guten William Hut, som har slekt frå Sund, er entusiastisk:
– Eg trur alle artistane syntest dette høyrdest umiddelbart spanande ut. Miljøet her gjer sitt – det blir koseleg for alle partar.
