Etter å ha vakse opp i bakkane over Sogndal, tenkte bassist Vegard Loftesnes og dei andre karane i Tyyl! at det kunne ha gjort seg med ein musikkvideo frå nabolaget.
Ideen har resultert i eit spektakulært skirenn over bakkar, berg, hagar og bilvegar – før det heile blir avslutta i Sognefjorden.
- Først tenkte me å stå på ski i vegane rundt der, så tenkte me kvifor ikkje stå på ski beint ned, fortel Loftesnes.
Henta hjelp i tide
Rockarane har allereie nærare 9000 visningar av videoen på Youtube – truleg blir det fleire.
Til å stå for dei spektakulære stunta, måtte rockarane henta inn proffar frå fristilorganisasjonen Bratt Moro.
Å stå for dei halsbrekkande stunta sjølv, var uaktuelt.
- Gitaristen vår er ganske god å stå på ski, men han seier han ikkje var god nok til dette. Me fekk med gode vener og fans til å ta seg av den biten. Det er ganske halsbrekkande, enkelte av dei tinga dei gjer her, seier bassist Loftesnes.
Tryggja trafikken
I videoen står skiløparane i full fart både i trafikk og snø, med bilar rundt omkring. Innspelinga gjekk likevel relativt trygt føre seg, kan bandet forsikra om.
- Dei tryna jo litt her og der, men det gjekk ganske trygt føre seg. Me hadde folk som stoppa trafikken, så det ikkje kom bilar midt i løpet.
Til innspelinga fekk bandet òg hjelp av firmaet Falkeblikk, som stilte opp med modellhelikopter til å filma stunta. Innspelinga tok ei helg i Sogndal, der to av dei fire bandmedlemmene held til.
Publikum forstår lite
Låten «Mjelk og Honning» kjem ut på det neste albumet til Tyyl!, som er venta i løpet av våren. Tidlegare har dei gitt ut eit album og ein EP, og turnert rundt heile landet.
- Me syng jo på sogning, og folk syng med – sjølv om dei ikkje forstår kva dei syng, fortel bassisten.
I samband med den neste plata, ventar konsertar på Garage i Bergen 13. april, og på Meieriet i Sogndal dagen etter.
- Det plar vera mykje folk og stor stas når me speler i Bergen. Sist me spelte i byen, var på Garage i fjor. Det er mange sogningar der òg, veit du.
