Stings stjernelag

Dei fleste kjenner han som popstjerna med hits som «Englishman in New York». Men 60-åringen som går på scena på Plenen tysdag kveld, har ei fortid innan jazzen. Det har han nytt godt av i solokarrieren.

På syttitalet spelte han sjølv i jazzband utanfor Newcastle, der han voks opp. Den dagen bassisten Gordon Matthew Sumner dukka opp på øving ein i gul- og svartstripete genser, fekk han namnet Sting.

Etter kvart gav han opp hobbykarrieren som jazzbassist, for å følgja popstjernedraumen med The Police.

Då han seinare starta solokarrieren på midten av åttitalet, gjekk han tilbake i dei gamle fotspora sine. Der The Police hadde vore påverka av reggaerytmer og punk, gjekk Sting saman med nokre av dei leiande jazzmusikarane i verda på den tida.

Frå punk til jazz

Trommis Omar Hakim og saksofonist Branford Marsalis var blant musikarane på Sting si første plate: «The Dream of The Blue Turtles» frå 1985.

Berre få år tidlegare hadde trommis Hakim spelt med legendariske Weather Report – jazzgruppa bassist Jaco Pastorius var medlem av.

Branford Marsalis blei ein fast samarbeidspartnar for Sting, og har òg laga eit namn for seg sjølv innan jazzen. Når det kjem til Sting sine låtar, står han blant anna for den ikoniske saksofonen på «Englishman In New York».

Resultatet av jazzmusikarane i bandet, blei eit popalbum med jazzpåverknader. Sjølv om albumet inneheld reinspikka poplåtar som «If You Love Somebody Set Them Free», finn ein òg jazzpastisjer som tittellåten på plata – ein instrumental, og ikkje minst «Moon Over Bourbon Street».

Eit nytt jazzlag

På nittitalet fann etter kvart Sting fram til nye jazzmusikarar å ha med i bandet sitt. Trommis Manu Katché speler på fleire av platene frå denne perioden – på same tid har han vore med på fire utgjevingar av den norske jazzsaksofonisten Jan Garbarek.

På plata «Ten Summoner's Tales» frå 1993 finn ein musikarane Sting har med seg til Bergen: gitarist Dominic Miller, keyboardist David Sancious og trommis Vinnie Colaiuta. Kvartetten utgjorde og bandet på verdsturneen etter plata, der dei blant anna vitja Oslo.

Både Miller og Sancious kom frå popverda – gitaristen hadde blant anna spelt med The Pretenders før han blei Sting si høgre hand i 1990. Sidan då har han spelt på alle Sting-platene, og stort sett vore med på det som er av turnear.

Thrash metal-musikar

Mannen mange musikarar likevel meiner er sjølve rosina i Sting-pølsa er trommeslagar Vinnie Colaiuta.

Som 22-åring blei amerikanaren invitert til audition til Frank Zappa sitt band, noko som førte til at han blei musikaren sin faste trommis.

I tillegg til å ha spelt med jazzmusikarar som gitarist Lee Ritenour og pianist Chick Corea, har Colaiuta lefla litt med tyngre saker.

Frå 2006 til 2007 rakk nemleg Colaiuta å turnera med bluesgitarist Jeff Beck, countrydronning Faith Hill, jazzpianolegende Herbie Hancock, og sist, men ikkje minst: å spela inn plate med thrash metal-kongane i Megadeth.

Det kan vera noko å tenkja på for dei som nyt balladen «Fields of Gold» i Bergen.