Sogn og Fjordane Teater får storinnrykk av kjendisar

- Det er litt tilfeldig at det blir ei slik samling av kjende skodespelarar eitt og same året. Men dei er no ikkje vanskeleg å be, seier teatersjef Terje Lyngstad.

I går presenterte regionteateret for Sogn og Fjordane neste års program. Kanskje har dei mange utmerkingane teateret har fått dei siste åra, mellom dei to Hedddaprisar for framifrå prestasjonar innan scenekunst, og Ibsenprisen, den einaste norske dramatikarprisen, gjort det lett å hente nokre av mest kjende skodespelarane i landet.

Helge Jordal skal spele klovn i Sirkus Saragossa, årets hovudsatsing frå teateret med base i Førde. I denne familieframsyninga skal også Yvonne Algrøy ha ei berande rolle. Stykket som handlar om eit sirkus som blir lagt ned, og der heile sirkusfamilien flyttar til ein liten by på Vestlandet, blir ein av to urpremierar neste år. Den andre blir ei framsyning der Jon Eikemo spelar hovudrollen i ein kabaret bygd på musikken til Per Janke Jørgensen, musikalsk leiar ved Sogn og Fjordane Teater i 35 år.

Den største turnéen i 2012 år blir nyoppsetjinga av stykket om predikanten og salmediktaren Mathias Orheim. I 2010 trekte Frode Rasmussen i rolla som Orheim og Linda Øvrebø som kona Marie fullsette kyrkjer over heile Sogn og Fjordane.  Oppsetjinga, som også fekk svært gode kritikkar, skal no visast på stader i fylket som ikkje fekk besøk sist, men dessutan også i Hordaland og Møre og Romsdal. Totalt blir det over 30 framsyningar frå midten av april med avslutning i Bergen først i juni.

Regionteateret byr dessutan på ein teaterversjon av «Susanna frå Sunnfjord», ein kammeropera basert på musikk av Mozart og tekstar av Oddvar Torsheim. I hovudrollen som Susanna er dottera til multikunstnaren frå Førde, Jorunn Torsheim.

Neste år byr også på ei rekkje kjende fjes i Kinnaspelet. Her blir noverande og tidlegare teatersjef ved DNS, Agnethe G. Haaland og Bjarte Hjelmeland, å sjå på same scene.

Det var ein nøgd teatersjef Terje Lyngstad som presenterte neste års program. Han kunne også fortelje at teateret har bak seg eit år med gode besøkstal. I alt såg 25.142 personar oppsetjingar av Sogn og Fjordane Teater i fjor:

- Det er eit publikumstal vi er veldig fornøgde med. Både samanlikna med andre regionteater og i forhold til folketalet i fylket, står det seg godt.