Nyttige idiotar

I GÅR GJORDE også Inger Bentzrud i Dagbladet seg syrleg og skreiv om unge PR-kåte jenter som tvingar lystene sine på offentlegheita og kallar det frigjering.

Same dag reklamerte Dagbladet Magasinet for dagens artikkel: «At menn vil ha mer sex enn kvinner er ingen myte.»

Her er vi midt inne i det svakaste punktet, sjølve akilleshælen i heile medieverda i augneblinken: Bentzrud er sjølvsagt ikkje ansvarleg for kva avisa hennar skriv, men kvifor den totalt manglande vilje til sjølvkritikk? Kven er det som dagleg pressa på oss all verdas slags lyster på side opp og side ned?

I går var VG mest oppteken av at Mette-Marit var «brukt» i ei sexmåling. I ei meiningsundersøkjing skal 500 nordmenn ha blitt spurt om dei kan tenkje seg å vere utru med kronprinsessa. Ikkje før langt uti saka kom det også fram at også kronprinsen var med blant dei ein skulle vurdere. Det var Dagbladet som hadde bedt om målinga.

Førre veke klinte same avisa fire jenter med raude pornomunnar på framsida av Magasinet (dei jentene Bentzrud sidan kom til å kritisere). Dei var sendt av eit lukkeleg forlag som hadde fått napp på boka si Rosa Prosa. Magasinet hadde fått førsterett til denne lett pirrande tematikken. Om ein framsyning på Skavlan er verdt ein million kroner, som informasjonsrådgjevar Kjell Terje Ringdal i Dinamo sa i Dagbladet i går, er det vel nokon som har rekna på kva boklansering i Magasinet er verdt. Sikkert mykje pengar.

JENTENE STILLER, nærast på oppdrag frå forlaget, og blir (og dette veit dei truleg sjølv, mange av dei er flittige medieaktørar) deltakarar i det spelet som heiter «kvinnepresentasjon»: Ei kvinne kan altså ikkje representere seg sjølv, ei kvinne må iscenesetjast. Dette veit alle fotografane i Magasinet. Dei kjenner si Annie Leibovitz. Dei – i dette tilfellet Agnete Brun - tenkjer: Hmmm, jenter, kåtskap. Eg tek dei med i Vestkantbadet: Av alle kvinnelege stereotypiar er våt kvinne den mest klisjéaktige. Det er her eg får lyst til å rope STOPP!!! IKKJE BLI MED!!!

Kven er så ansvarleg for det som skjer? Kanskje er det ikkje mogleg å seie nei til å vere med på slike bilete, kanskje til og med jentene ikkje hadde motførestellingar mot det? Er det mogeleg å føresjå korleis slikt verkar?

ARTIKKELEN BLIR TRYKT. Debatten kjem i gong, men av ein eller annan grunn så er det ingen som ser ut til å tenkje på å halde media så mykje som litt medansvarleg for at årets 8. mars kjem til å gå inn i historia som kåtheits-dagen.

I dagens mediabilete er det jentene som er dei ansvarlege for å seie nei. Dei er ansvarlege for å vere medvetne om å sette grenser for korleis ein sjølv vil bli presentert i media.

Same ansvar har jenter for å seie ja for å vere til stades som stemmer i ålmenta.

På nokre tidels sekund, blei jentene bak Rosa Prosa transformerte frå sjølvstendige individ til sexobjekt. Var det objekt dei ville vere? Neppe.

I DAG, VIL DEI SJÅ, kokar Magasinet vidare på den trusa dei fekk i fanget sist veke: «At menn vil ha mer sex enn kvinner er ingen myte» blir det påstått. Så har vi det gåande.

Kanskje det er på tide å seie det høgt: Neste gong ei avis ringer, knip igjen!