Kva låt er mest romantisk?

I dag gler alle hjarte seg under valentinsdagen, og bt.no har difor spurt to lokale artistar som burde ha spesialkompetanse innan romansefaget to spørsmål: Kva er den mest romantiske låten i verda, og kva låt er best å høyra på når det er blitt slutt i eit forhold? Me gir ordet til den yngste først: vokalist Agnes Maria Rokkan i countrybandet Empty Bottles Broken Hearts.

- Den mest romantiske låten er «I Love You A Thousand Ways», med den amerikanske countryartisten Lefty Frizzell. Låten blei gitt ut i 1950, og har ein veldig spesiell historie, fortel Rokkan.

Facebook og strømmetenesta Spotify har sett saman ei eiga liste over kva låtar folk høyrer på når dei er blitt saman med nokon, og kva låtar dei høyrer på når det er blitt slutt. Sjå dei to spelelistene fra youtube som ligg i saken.

I eit forhold

Skriven frå fengselet

Frizzell sat i fengsel då han skreiv låten – til kona.

Han sat i fengsel fordi han hadde ein tendens til å hamna på skråplanet når han spelte konsertar, og sikkert haldt på med mykje fanteri. Denne gongen hadde han i tillegg vore utru med ei jente som var fjorten år – sjølv var han nitten. Han var veldig redd for at kona skulle gå frå han, så då skreiv han denne teksten som eit brev til henne. Så forhistoria er kanskje ikkje så romantisk, men songen er veldig potent.

- Korleis gjekk det med dei to til slutt?

- Eg trur ikkje ho forlét han. Iallfall ikkje med det første. På sikt, veit eg ikkje, men eg mistenkjer at det kan ha gått dårleg.
 

Avsluttet forhold

Moderne duett

Med songar som «Ingen er så nydelig som du», må Tor Endresen seiast å vera på Bergens topp når det kjem til romantiske artistar. Sjølv har han vald seg ein moderne versjon av ein klassikar som den mest romantiske låten.

- «Quando, Quando, Quando» – i versjonen med Michael Bublé og Nelly Furtado. Det finst ikkje maken til låt som inviterer til både peiskos og stearinlys, vinglas, smoking, ein vakker kjole og tett dans. Sett på den låten, så skjøner du kva eg meiner, seier romansekongen frå Bønes.

At versjonen er den rette, er viktig.

- Mange kjenner låten som heismusikk, eller i vilter, spansk versjon, men denne versjonen er spelt inn som ein roleg bossa nova. Verdas mest romantiske, seier Endresen.

Druknar sorga

Verken Endresen eller Rokkan er i tvil om kva låt som passar best å høyra på når det er blitt slutt i eit forhold.

- Skulle det vera en som er til trøyst etter eit brot, må det vera «Fryd» med Anne Grete Preus, seier Endresen.

- Den fortel deg at uansett kor gale det måtte vera, ligg det gode ting og ventar på deg.

Agnes Maria Rokkan i Empty Bottles, Broken Hearts, går for nok ein gammal countrylåt.

- Det må bli ein song av ein artist som heiter George Jones. Han er veldig flinkt til å skriva hjarteskjerande balladar. Denne heiter «If Drinkin' Don't Kill Me (Her Memory Will)». I veldig mange år, var han saman med den kjende countryartisten Tammy Wynett. Men ho skilde seg frå han. Han var nemleg ein notorisk alkoholikar og umogleg å vera gift med. Hjartet hans var knust etter skilsmissa, og han kom seg vel aldri. Så han har skrive ein drøss med balladar om henne, og er kongen av breakup-songar.