Amputert, men spennande

Vossa Jazz si crossover-satsing på ekstremsport heldt først på å blåsa bort. Så vart det nesten vindstille. 26 luftsportsutøvarar som skulle letta med speedflyerskjermar frå Hangur eller hoppa med fallskjerm frå helikopter, vart redusert til fem. Men dei gav publikum ein skikkeleg smakebit på kva som kan gjerast i lufta til musikk frå bukkehorn, saksofon, fele og rytmeinstrument.

Seglem har lagt arbeid i å tilpassa musikken sin til stunta i lufta, men musikken viste seg fengande nok til å engasjera publikum på Prestegardslandet i rikt monn. Dei visste lite om kor stort show som var planlagt.

Ein fugleflokk som flaug i formasjon lågt over scene og publikum, var såvisst ikkje eit planlagt  innslag. Fuglane ville berre visa kven som frå naturen si side er herrar i lufta.

Opphaveleg var planen at musikarar og publikum skulle stå på taket av det nye kulturhuset, men der er snøen borte, og graset så vidt teke til å spira. Det ville ikkje ha tolt trakket av så mange.