Fylkestinget i Sogn og Fjordane vedtok i går med 21 mot 18 røyster å løyve 600.000 kroner til delfinale i Melodi Grand Prix i fylket i 2013, for tredje år på rad.
Det får Alfred Bjørlo (V), fylkestingsrepresentant og ordførar i Eid, til å reagera.
- Kva er dette? Vi er ikkje noko indianerreservat, vi er eit heilt normalt fylke med større vekstpotensial enn dei fleste. Då må vi oppføre oss slik også, sa Bjørlo under debatten i fylkestinget.
Så vidt han er kjent med, er Sogn og Fjordane det einaste fylket i landet som har løyvd fylkeskommunale midlar til Grand Prix-delfinalar.
- Dårleg sjølvtillit
Venstre røysta mot løyvinga saman med Sp, KrF og SV. Ap, Høgre og Frp utgjorde fleirtalet, som dermed sørgde for at Sogn og Fjordane fylkeskommune samla har gått inn med 2,25 millionar kroner til å arrangere Grand Prix-delfinalar dei siste tre åra. Delfinalane har alle funne stad i Florø.
- Eg likar Grand Prix. Og eg likar Florø. Og eg syns i og for seg det er greitt at vi har svidd av ein del pengar på å gjere Florø til Grand Prix-by, ved starthjelp til den første delfinalen i 2011. Men no syns eg ærleg talt det får halde. No er dette eit arrangement som må stå på eigne bein, meinte Bjørlo.
Han fekk støtte frå KrFs representant Tore Storehaug:
- Vi må ikkje ha så dårleg sjølvtillit i dette fylket at vi som einaste fylke i landet må betale for å få lov å arrangere Melodi Grand Prix, sa Storehaug.
Høgre-politikar i heisekran?
Fleirtalet meinte likevel at arrangementet vil gje så store ringverknader for fylket at det er verdt løyvinga.
- Vi veit at nede i Aserbajdsjan i mai var det svigersonen til presidenten som blei heist ned på scena i heisekran som pauseunderhaldning. Kven av Høgre sine kronprinsar i Florø, Jacob Nødseth og Bjørn Hollevik, som blir heist ned på scena til Florø for å underhalde det norske folk veit ikkje eg, men eg gler meg uansett, avslutta Bjørlo.
REAGERAR: Alfred Bjørlo (V), fylkestingsrepresentant og ordførar i Eid.
